കളം നിറഞ്ഞ് യമാല്‍; കോപ്പ ഡെല്‍ റേയില്‍ ബാഴ്‌സയുടെ ഗോള്‍മഴ, റയല്‍ ബെറ്റിസിനെ വീഴ്ത്തി ക്വാര്‍ട്ടറില്‍

കോപ്പ ഡെല്‍ റേയില്‍ ക്വാര്‍ട്ടര്‍ ഫൈനലിലേക്ക് മുന്നേറി ബാഴ്‌സലോണ. റയല്‍ ബെറ്റിസിനെതിരെ നടന്ന പ്രീക്വാര്‍ട്ടര്‍ പോരാട്ടത്തില്‍ ഒന്നിനെതിരെ അഞ്ച് ഗോളുകളുടെ വമ്പന്‍ വിജയമാണ് ബാഴ്‌സ സ്വന്തമാക്കിയത്. ബാഴ്‌സയുടെ യുവതാരം ലാമിന്‍ യമാല്‍ ഒരു ഗോളും ഒരു അസിസ്റ്റും നേടി തിളങ്ങി.

സ്വന്തം തട്ടകത്തില്‍ നടന്ന മത്സരത്തിന്റെ തുടക്കം തന്നെ ബാഴ്‌സ ഗോള്‍വേട്ട ആരംഭിച്ചു. മൂന്നാം മിനിറ്റില്‍ യുവതാരം ഗാവിയാണ് സ്‌കോറിങ് തുറന്നത്. 27-ാം മിനിറ്റില്‍ ഡിഫെന്‍ഡര്‍ ജുല്‍സ് കുന്‍ഡെ ബാഴ്‌സയുടെ ലീഡ് ഇരട്ടിയാക്കി. ലാമിന്‍ യമാലാണ് രണ്ടാം ഗോളിന് വഴിയൊരുക്കിയത്.

രണ്ടാം പകുതിയില്‍ ബാഴ്‌സ ആക്രമണം തുടര്‍ന്നു. 58-ാം മിനിറ്റില്‍ റാഫീഞ്ഞയിലൂടെ ബാഴ്‌സ മൂന്നാം ഗോളും കണ്ടെത്തി. തൊട്ടുപിന്നാലെ 67-ാം മിനിറ്റില്‍ ഫെറാന്‍ ടോറസും 75-ാം മിനിറ്റില്‍ ലാമിന്‍ യമാലും ഗോള്‍ നേടിയതോടെ അഞ്ച് ഗോളുകള്‍ക്ക് ബാഴ്‌സ മുന്നിലെത്തി. 84-ാം മിനിറ്റില്‍ പെനാല്‍റ്റിയിലൂടെ വിറ്റര്‍ റോക്ക് റയല്‍ ബെറ്റിസിന് വേണ്ടി തിരിച്ചടിച്ചെങ്കിലും അത് ആശ്വാസഗോള്‍ മാത്രമായി മാറി.

Content Highlights: Copa del Rey: Yamal stars as Barcelona hammers five past Real Betis to sail into quarterfinals